ANALIZË RENDI RAJONAL DHE GLOBAL ÇMIMI I TË ARDHMES Ditmir Bushati Maj 2022 Në një periudhë të afërt, ka pak gjasa të shohim një traktat paqeje, një fund të vërtetë të konfliktit apo ndryshimin e regjimit në Rusi. Tani për tani synimi është që Rusia të mos zotërojë më shumë territor sesa kishte para pushtimit të Ukrainës dhe të përmbahet nga përdorimi i armëve të shkatërrimit në masë. Edhe pse NATO është zgjeruar në lindje, duke pranuar shtete që dikur bënin pjesë në Paktin e Varshavës, Rusia ka gëzuar siguri të paprecedentë në krahun e saj perëndimor. Moska, madje mirëpriti atë që konsiderohet si lëvizja më e rëndësishme e aleancës: një Gjermani e ribashkuar e përfshirë brenda strukturave të NATO-s. Rusia nën udhëheqjen e Putinit e ka shikuar me dyshim integrimin e saj në rendin ndërkombëtar të vendosur pas Luftës së Ftohtë me frikën se nuk do të kishte fuqinë e duhur për të përcaktuar fatin e sigurisë në Europë dhe botë. 1