რუსეთის ფედერაციის შეიარაღებული ძალების უკრაინაში შეჭრის შემდეგ აშშ-მ, ევროკავშირმა, დიდმა ბრიტანეთმა და ცივილიზებული სამყაროს სხვა სახელმწიფოებმა რუსეთის ფედერაციას, როგორც აგრესორ ქვეყანას, მკაცრი ეკონომიკური სანქციები დაუწესეს. საერთაშორისო დონეზე უკრაინის მორალური, ჰუმანიტარული და პოლიტიკური მხარდაჭერის მიუხედავად, საქართველომ რუსეთის ფედერაციის მიმართ ინდივიდუალური სანქციები არ შემოიღო, რომელთა დაწესებაც, საქართველოს მთავრობის აზრით, საპასუხო სანქციების გათვალისწინებით, დიდ დარტყმას მიაყენებდა პანდემიით დასუსტებულ საქართველოს ეკონომიკას. ამ ფონზე, ცალკეულმა პირებმა საქართველო საერთაშორისო სანქციების თავიდან აცილების ხელშეწყობაში დაადანაშაულეს; კერძოდ, სათანადო მტკიცებულებების წარმოდგენის გარეშე, აღინიშნა, რომ საქართველოდან ხდება რუსეთის ფედერაციაში სანქცირებული საქონლის შედინება. ამ ბრალდებამ საერთაშორისო მედიის და პოლიტიკური წრეების ყურადღება მიიქცია, რაც საქართველოსთვის სერიოზულ რეპუტაციულ რისკებს უქმნის. ამდენად, ერთობ მნიშვნელოვანია ამ საკითხთან დაკავშირებით, ფაქტებზე დაფუძნებული კვლევის გზით, ჭეშმარიტების დადგენა. ფრიდრიხ ებერტის ფონდი და საქართველოს სტრატეგიისა და საერთაშორისო ურთიერთობების კვლევის ფონდი (რონდელის ფონდი) წარმოგიდგენთ არსებული სტატისტიკური მონაცემების საფუძველზე მომზადებულ კვლევას, რომლის მიზანია პასუხი კითხვაზე, გამოიყენება თუ არა საქართველოს ვაჭრობა რუსეთის ფედერაციასთან საერთაშორისო სანქციების თავის არიდების საშუალებად.