ადგილობრივი თვითმმართველობის განხორციელებაში მოსახლეობის ჩართულობა და მოქალაქის უფლება, მონაწილეობა მიიღოს საზოგადოებრივი საკითხების მართვაში, – დემოკრატიული მმართველობის ძირითადი პრინციპია. სამოქალაქო მონაწილეობის პრაქტიკის დანერგვისას, ნორმატიულ-სამართლებრივი ბაზისის ფორმირება საწყისი ეტაპის ერთ-ერთი საკვანძო ელემენტია. თუმცა, ინსტიტუციური მხარდაჭერისა და ქმედითი ინსტრუმენტების შემუშავების გარეშე, მოქალაქეთა რეალური ჩართულობის უზრუნველყოფა პრაქტიკულად შეუძლებელია. წინამდებარე კვლევა მიზნად ისახავს გურიისა და კახეთის რეგიონების მუნიციპალიტეტების (ადგილობრივ) დონეზე მმართველობით პროცესში მოქალაქეთა ჩართულობის კანონით განსაზღვრული მექანიზმების, განსაკუთრებით მუნიციპალიტეტის მერის სათათბირო ორგანოს – სამოქალაქო მრჩეველთა საბჭოს გამოყენების შეფასებას.