Kërcënimet e sigurisë dhe marrëdhëniet me vendet e tjera Identifikimi i kërcënimeve kryesore të sigurisë për Shqipërinë ka qenë një tipar kyç i barometrit ndër vite. Të anketuarve u kërkohet rregullisht të identifikojnë kërcënimin e parë më serioz të sigurisë dhe kërcënimin e dytë më serioz të sigurisë për Shqipërinë. Në vitin 2024, 45% e identifikuan korrupsionin si kërcënimin më serioz të sigurisë, i ndjekur nga krimi i organizuar me 23.8% dhe lufta me 17.6%. Përqindja e qytetarëve që e identifikojnë korrupsionin si kërcënimin kryesor të sigurisë në këtë anketë është më e lartë se në vitet e mëparshme(39.3% në 2022, 36.9% në 2020). Krimi i organizuar gjithashtu identifikohet si kërcënim për sigurinë nga një përqindje më e madhe e qytetarëve, 23.8% krahasuar me anketat e mëparshme(19.2% në 2022, 20.3% në 2020). Kërcënime të tjera që janë identifikuar nga më shumë qytetarë krahasuar me vitet e mëparshme janë krimi kibernetik 7%(0.7% në 2022), migrantët e huaj 4,3%(1% në 2022 dhe 0.8% në 2020). Më pak qytetarë e konsiderojnë luftën me vendet e tjera (30.2% në 2022 dhe 7.62% në 2020) dhe terrorizmin(4.8% në 2022 dhe 10.67% në 2020), si kërcënimet kryesore. Marrëdhëniet me vendet e tjera dhe qëndrimet pozitive apo negative për vende të ndryshme janë një tjetër tipar kyç i Barometrit të Sigurisë. Këto të dhëna synojnë të japin një kuptim sesi pikëpamjet e të anketuarve për sigurinë janë formësuar nga zhvillimet dhe ndërveprimet ndërkombëtare. Ndërkohë që konkurrenca për ndikim në botë është intensifikuar gjithnjë e më shumë gjatë viteve të fundit, ky edicion ka marrë opinione mbi ndikimin e tri fuqive të mëdha botërore, SHBA-së, Kinës dhe Rusisë, si dhe dy fuqive rajonale, Iranit dhe Turqisë. Të anketuarve iu drejtua pyetja“Cili mendoni se është ndikimi i(vendit) ndaj Shqipërisë?” për secilin nga vendet e lartpërmendura. Shumica e qytetarëve shqiptarë mendojnë se SHBA-të kanë një ndikim pozitiv ose shumë pozitiv ndaj Shqipërisë(78%). 17.4% mendojnë se ndikimi i SHBA-së nuk është as pozitiv dhe as negativ. Përgjigjet për Turqinë tregojnë pothuajse të njëjtat rezultate me ato të SHBA-së. Kina është vendi ndaj të cilit shumica e shqiptarëve janë ambivalent. 53.9% mendojnë se ndikimi i Kinës nuk është as pozitiv dhe as negativ, ndërsa 21.6% mendojnë se ndikimi i Kinës është pozitiv ose shumë pozitiv. Rusia dhe Irani shihen pothuajse njësoj nga shqiptarët, megjithëse përqindja e atyre që mendojnë se ndikimi i Iranit është negativ është pak më e vogël. 29