ПРЕДГОВОР Во Република Македонија(денес Република Северна Македонија) од 80-тите години на минатиот век започна историски процес на општествена и економска трансформација: приватизација на претпријатијата со опште­ствен капитал, во пазарна економија со доминантна приватна сопстве­ност, како и напуштање на еднопартискиот, во повеќепартиски политички систем. Во ваквиот турбулентен период Република Македонија се најде и во виорот на историските настани во поранешната Федерација и стекну­вањето независност. За синдикатите, транзициските процеси во државата беа силен пре­дизвик во застапувањето на правата и интересите на работниците – син­дикалното членство, за што неминовни беа промени и во организациска смисла и во начинот, методите и принципите на дејствување, во институ­ционалната поставеност и остварувањето на улогата на социјален партнер во креирањето на политиките од економската и социјалната сфера и ра­ботно-правната положба на работниците. Со оглед на огромниот број активности на синдикатите, наспроти по­стојниот обем на истражувања за синдикализмот во нашата држава во на­ведениот временски период, целта на трудот е да придонесе да се одбеле­жат стратешките заложби на синдикатите во интерес на остварувањето и подобрувањето на правата од работа на своето членство и работниците, согласно меѓународните трудови стандарди. Како сегашните и идни гене­рации работници синдикално организирани да ги бранат и унапредува­ат своите права, како да се борат и изборат да живеат достоинствено од својот труд, како заедно да минуваат низ премрежињата и да партиципи­раат во изградбата на современо, демократско општество, како што е де­кларирана со Уставот нашата држава, Република Северна Македонија. Заради поголема прегледност, конципиран приказ на синдикалните активности и акции, во оваа публикација истите се класифицирани во 10 делови, според основните тематски подрачја кои се предмет на третирање на синдикатите во нивните стратегии и платформи. До појавата на синди­калниот плурализам, се претставени синдикалните активности и акции на синдикатите здружени во ССМ, како единствен синдикален сојуз. Посебна благодарност искажувам на синдикатите на сите нивоа на ор­ганизираност, на рецензентите за добронамерните укажувања, како и на сите други соработници за стручната и моралната поддршка во текот на пишувањето на трудот. Од авторот Инда Костова Савиќ ПРЕДГОВОР 11