Âkötä wagï na ndö tî sêdutï afa na gïgî âkpälë ndêndê, âwasâra na yê sô âla sâra na nïngängö tî âkpälë sô yake kîri lâkûê. Na bängö ndo tî âla, Bêafrîka ayeke mbênî ködörö sô awôko anînga mîngi, sô nzorôko nî ayeke zïngö terê tî ngurugbïä na âkusâla tî lo, na zïängö sälängö ngangü na âturûgu kpälë, âbûmbi tî fängö zo, na âturûgu kömbûka. Aîri ködörö sô lâsô « Sêse tî âturûgu tî sîrîrî tî Bêndo tî Gïgî, ndâli tî sô lo wara âkuatokua tî bätängö sîrîrî 13 tî löndö na ngû 1997 à sï na lâsô » Atâa gängö tî âkuatokua tî sîrîrî na pekô tî terê, Bêafrîka angbâ lâkûê ndo sô âkpälë ayeke da mîngi, kpälë nî awara ngangü ndâli tî nzara tî bê tî âwasâra tî yâ tî ködörö nî na âla tî wandê, ngâ na âbêndo tî âködörö ndêndê na lêgë tî mosoro, tî lêndo-porosö na tî lêndo-kodëto.