Ny fanadihadiana natao tamin’ny 2021 tao Antananarivo sy Antsirabe tany amin’ireo orinasa mamokatra ho an’ny ASOS sy INDITEX dia nampivoitra ny olana sedrain’ny mpiasa vokatry ny fanosihosena ny zon’izy ireo, indrindra ny momba ny ora iasana, ny karama, ny herisetra sy ny antsojay eny amin’ny toeram-piasana, anisan’izany ny herisetra mifototra amin’ny mahalehilahy na mahavehivavy, ny zon’ny vehivavy sy ny fiarovana azy raha mitondra vohoka na miteraka, ny falalahana sendikàly sy ny zo hanao ny fifampiraharahana iombonana. Io fanadihadiana io dia natao nandritra ny tetikasa“Organising in TGSL” na« Fandaminana ny mpikambana amin’ny seha­pamokarana Lamba, Fitafiana, Kiraro ary Hoditra» izay notanterahana teto Madagasikara nandritra ny telo taona, ny 2021 hatramin’ny 2023. Ity tatitra ity dia miompana amin’ny fanombanana io tetikasa io. 2. FANAZAVANA FINTINA NY TETIKASA 2.1. Tanjon’ny tetikasa NY tanjon’ny tetikasa dia ny hanamafisana ny asa ataon’ny sendikà malagasy mpikambana ao amin’ny IndustriALL Global Union eny anivon’ny ozinina mamokatra ho an’ny Marika izay nanao fifanarahana GFA, ary ny hamelana ny sendikà hamaritra paikady hanaovana ny dinika sosialy any amin’ny toeram-piasana sy ny indostria, indrindra ho an’ny falalahana sendikàly, ny karama, ny tombontsoa ara-tsosialy sy ny ady atao amin’ny herisetra mifototra amin’ny mahalehilahy na mahavehivavy. 2.2. Ireo iantefany Misokajy roe ireo iantefan’ny tetikasa, ka anisan’izany: 2.2.1. Ireo iantefany mivantana Ny iantefany mivantana dia ny sendikàn’ny mpiasa ao amin’ny orinasa Mpamatsy ireo Marika mpiray antoka amin’ny GFA, ny solotena sendikàly, ny solotenan’ny mpiasa izay natao hifampiresaka sy hanao fifampiraharahana iombonana miaraka amin’ny mpampiasa, mba hiaro sy hanatsara ny tombontsoan’ny mpiasa etsy andaniny, ary mba hohainoana ny feon’ny mpiasa ho fampandrosoana ny orinasa etsy ankilany. 2.2.2. Ny mpisitraka farany sy ny orinasa nipoirany 2.2.2.1. Mpisitraka Ny mpiasa ao amin’ny orinasa Mpamatsy ho an’ny orinasa fehezin’ny GFA. Ho an’ny tombontsoan’izy ireo indrindra no anatanterahan’ny sendikà ireo asa enti-manatratra ny tanjon’ny tetikasa araka ny andininy 2.1 eo ambony. 2.2.2.2. Orinasa nipoirany Mba ho fanajana ny fomba fanao sy ny fitanana ho tsiambaratelo ny toerana sy ny anaran’ny orinasa voakasika, dia famantarana na“codes” samihafa no ampiasaina amin’izao tombana izao, tahaka izay natao nandritra ny fanadihadiana tany amin’ny fiandohan’ny tetikasa. Tany am-boalohany, ny tetikasa dia nikasa ny hahatratra orinasa 10, ka 6 ao Antananarivo, ary 4 ao Antsirabe. Ity tombana ity kosa dia mahakasika orinasa miisa 4: ANTA3, ANTA6, ANTA7 ary ABE5. Nandritra ny fanatanterahana ny tetikasa dia orinasa miisa 8 izay hita tao amin’ny fanadihadiana 2021 no tsy tafiditra instony tao amin’ny asa natao. Ho an’ny orinasa ao Antananarivo dia isan’izany ny ANTA1, ANTA2, ANTA4, ary ny ANTA5. Ho an’Antsirabe, ny orinasa rehetra izay nokendrena tamin’ny fanadihadiana dia“voahilika” avokoa tamin’ny asan’ny tetikasa(ABE1, ABE2, ABE3, ary 11