Parathënie Vështirë se ka një fushë politike në të cilën perceptimet luajnë një rol më të rëndësishëm sesa në fushën e politikës së sigurisë. Perceptimi i qytetarëve për kërcënimet e sigurisë dhe parashikimi i sigurisë si një nga funksionet themelore të shtetit ka një ndikim vendimtar në shoqëritë dhe zhvillimin e tyre. Ato ndikojnë në përparimin ekonomik dhe social, mbështetjen për rishpërndarje te masave, gatishmërinë e qytetarëve për të marrë përsipër përgjegjësi në komunitetin e tyre dhe shumë aspekte të tjera që përcaktojnë vetë bazën e kontratës sociale të çdo shoqërie. Me rëndësi është se rritja e perceptimeve jo domosdoshmërish korrespondon me dinamikën e rreziqeve aktuale. Për shembull, aktet selektive të dhunës mund të kenë një ndikim të fortë në perceptimin e sigurisë individuale, shumë më të fortë se sa ajo që do të korrespondonte me kërcënimin aktual në jetën e përditshme të një qytetari. Sidoqoftë, është perceptimi në veçanti i cili duhet të merret parasysh kur debatohet për zgjidhje të përshtatshme politike për shkak të efektit të tyre në shoqëri dhe zhvillimit të saj. Në të njëjtën kohë, politika e sigurisë duhet të lejojë një ekuilibër delikat të parashikimit të sigurisë(dhe krijimin e një perceptimi të duhur të saj) dhe garantimin e të drejtave dhe lirive themelore demokratike. Edhe masat bazike të ligjshme të sigurisë kufizojnë lirinë e qytetarëve në një farë mase. Megjithatë, nëse keqpërdoren, ato madje mund të bëhen një mjet i sigurte për strukturat e pushtetit që të pengojnë proceset demokratike. Gjetja e këtij ekuilibri midis plotësimit të nevojave të sigurisë së shoqërive nga njëra anë dhe garantimit të të drejtave themelore nga ana tjetër, kërkon një diskutim të gjerë duke përfshirë vendimmarrësit politikë dhe aktorët shoqërorë. Ky diskutim mbi politikën e sigurisë duhet të jetë një ushtrim i vazhdueshëm. Perceptimet ndryshojnë së bashku me zhvillimin dinamik të rreziqeve dhe aktorëve. Çështjet e sigurisë shtrihen në nivele të ndryshme,- nga niveli lokal në atë global. Ato ndryshojnë nën një sërë kushtesh dhe veprimesh komplekse. Problemet variojnë nga krimi i organizuar dhe efektet e korrupsionit në kontekstin kombëtar deri tek terrorizmi ndërkombëtar dhe një mjedis global gjithnjë e më armiqësor. Të gjitha këto çështje përshihen në perceptimin e qytetarëve te cilat janë paraqitur në këtë Barometër Shqiptar të Sigurisë. Të dhënat dhe informacionet janë mbledhur dhe analizuar për të shërbyer si një burim për dialogun e politikave të sigurisë dhe për të lehtësuar zhvillimin e politikave gjithëpërfshirëse me përfshirjen e një game më të gjerë të aktorëve shoqërorë. Shoqëria civile duhet të ketë një rol të fuqishëm në këtë dialog duke këmbëngulur në një shqyrtim të kujdesshëm të nevojave të sigurisë dhe lirive themelore. 11