Hyrje Siguria është një prej aspekteve më përcaktues të çdo shoqërie të së drejtës dhe një funksion themelor i shtetit. Strategjia e Sigurisë e BE-së e ka përcaktuar sigurinë si një aspekt thelbësor dhe si një kusht paraprak i zhvillimit ekonomik dhe social. 1 Përgjatë viteve të fundit siguria ka dalë sërish në pah si problem i rëndësisë më të madhe në shumë fusha dhe nivele. Në nivelin individual dhe komunitar perceptimet dhe vendimmarrja e përditshme lidhur me aktivitete familjare apo çështje të punësimit, formësohen dhe influencohen edhe nga një shumëllojshmëri shqetësimesh lidhur me sigurinë. Në nivelin kombëtar, shqetësimet lidhur me krimin e organizuar, korrupsionin, radikalizmin dhe terrorizmin, kanë influencuar vazhdimisht politikat, vendimmarrjen dhe veprimet qeveritare. Dështimet e vazhdueshme në mposhtjen me efektivitet të konglomeratit të korrupsionit dhe krimit të organizuar, sollën ndërmarrjen dhe zbatimin e një reforme gjithëpërfshirëse të drejtësisë. Lindja e organizatës terroriste ISIS, të cilës iu bashkuan 144 qytetarë shqiptarë, shpuri në ndërmarrjen e masave dhe politikave qeveritare me qëllim adresimin e këtij problemi. Pas shpërbërjes së ISIS, shqetësime të sigurisë lidhen me luftëtarët e kthyer apo në kthim, sa i takon përfshirjes potenciale të tyre në aktivitete terroriste apo radikalizuese. Në nivel rajonal, procesi i vështirë dhe i ngadaltë i integrimit në NATO dhe BE, i përcaktuar si themeli i sigurisë së rajonit, demokratizimi i ngadaltë dhe zhvillimi i dobët ekonomik, kanë penguar formësimin e një komuniteti sigurie ndër vendet e Ballkanit Perëndimor. Mosmarrëveshjet e vazhdueshme dhe çështjet e pazgjidhura kombëtare, kanë ngadalësuar proceset e paqësimit dhe kontribuojnë në nivelin e ulët të mirëbesimit midis qyetarëve të këtyre vendeve, element ky që sjell shqetësime sigurie në fushën e marrëdhënieve ndërshtetërore. Shqetësimet lidhur me sigurinë dhe zhvillimet në nivelin Europian dhe më gjerë, kanë rezonuar edhe në nivel rajonal dhe kombëtar. Efektet dhe kundërpërgjigjet lidhur me sulmet terroriste në kryeqytetet Europiane, krizat në marrëdhëniet transatlantike dhe pasiguritë lidhur me fuqitë në rritje si Kina dhe Rusia, kanë kontribuar në mënyrat se si siguria kuptohet, perceptohet dhe se si veprohet për ta realizuar atë. Në mënyrë që të mund të arrihen rezultate në përballjen me këto sfida, qeverive dhe institucioneve të sigurisë, ju jepen resurse të konsiderueshme financiare dhe njerëzore, si dhe kompetenca të zgjeruara. 1 European Commission.“A Secure Europe in a Better World European Security Strategy”. Brussels, 8 December 2003. http://data.consilium.europa.eu/doc/document/ST-15895­2003-INIT/en/pdf 13