Metodologjia PYETËSORI Pyetësori i përdorur për këtë anketë përbëhet nga 80 pyetje me alternativa, nga të cilat 8 ishin demografike/gjeografike, dhe 1 është administrative. Disa pyetje janë të ndërlidhura me njëra tjetrën në sens rendor në rangun e 2 ose 3 pyetjeve(10 dhe 11; 12 dhe 13; 14 dhe 15; 16 dhe 17; dhe 19, 20 dhe 21). Në marrjen e përgjigjeve ndaj këtyre pyetjeve, të anketuarit duhet të përjashtonin alternativën e parë të dhënë në pyetjen e mëparshme(si dhe alternativën e parë dhe të dytë në pyetjet me 3 sekuenca). Pyetjet sekuenciale janë zgjedhur për ato çështje për të cilat nevojitet mbledhja e të dhënave suplementare për një analizë më në thellësi. Për shembull, në pyetjen 19, 20, 21, të anketuarve iu kërkua që të jepnin vendin më shumë miqësor ndaj Shqipërisë dhe më pas vendin e dytë dhe të tretë më miqësor. Duke kombinuar të dhënat e mbledhura me anën e këtyre pyetjeve, ne arritëm që të observonim se cilat ishin alternativat më të shpeshta të cilat thuheshin nga të anketuarit(Pyetësori i plotë në Aneksin 1). KAMPIONI Për këtë anketë kemi përdorur një kampion rastësor të shtresëzuar prej 1115 personash në moshë madhore. Në shtresën e parë, observimet ishin të ndara në mënyrë proporcionale ndërmjet 61 bashkive të Shqipërisë, bazuar në popullsinë në moshë madhore të këtyre zonave. Në shtresën e dytë, observimet janë shpërndarë në mënyrë proporcionale midis zonave urbane, periferike dhe rurale, brenda çdo bashkie(Aneksi 2). Më pas kemi zhvilluar kuota proporcionale lidhur me moshën dhe gjininë e secilës nënshtresë. Në fund, pikat gjeografike janë paracaktuar në mënyrë rastësore në hartën e Shqipërisë, sipas skemës së mësipërme të kampionimit(Figura 1). Qëllimi i kësaj skeme të shtresëzuar të kampionimit ishte arritja e një përfaqësimi sa më të saktë gjeografik dhe demografik të popullsisë në moshë madhore të vendit, duke mbajtur një marzh gabimi më të vogël sesa+/- 2.9% për të tërë kampionin dhe jo më shumë sesa+/-4.1% për nën-kampionet. Ky kampionim i rastësishëm garanton që çdo banor i Shqipërisë ka probabilitet të barabartë për tu zgjedhur për të marrë pjesë në këtë anketë. Me këtë metodë kampionimi, rezultatet e kësaj ankete i reflektojnë sjelljet dhe perceptimet e totalit të popullsisë në moshë madhore të Shqipërisë. 16